Agkidkiddaw iti hustiya ti pamilya ti third year chemical engineering student a ni John Matthew Salilig kalpasan a pimmusay gapu iti maatap a hazing.
Bangkayen a nasarakan ti bagi iti biktima iti bakante a lote idiay Imus, Cavite kalpasan a nagpukaw daytoy iti nabiit pay.
Sigun iti kabsatna, nagpakada ni Salilig nga ag-atendar laeng iti welcoming rites iti maysa a fraternity idiay Laguna idi Pebrero disi siete ken gapu ta miyembro metlaeng ti kabsatna isu a pinalubusanna ni Salilig.
Nakaawat lattan dagitoy iti mensahe manipud iti kadwada iti fraternity nga adda saan nasayaat a napasamak kenni Matthew kalpasan iti maatap a hazing.
Maibasar iti mensahe, naiturong ni Matthew idiay Cavite tapno idiay kuma a mataming kalpasan iti panangbautda kenkuana ngem iti bandang alas dos ket kellaat a pimmusay.
Gapu iti butingda ta saanen nga agang-anges ni Matthew, inkalida isuna iti bakante a lote.
Dagus a nangisayangkat iti imbestigasyon ti pannakabagi iti linteg ken sangapulo ket walo nga indibidwal ti nabigbigda kas suspek.
Sigun iti maysa kadagiti nakadwa ti biktima, saan a bumaba iti pitopulo a pang-or ti naawat ni Matthew iti initiation rites a pimmusay iti uneg iti lugan.
Naduktalan ti ayan iti bangkay iti biktima kalpasan metlaeng nga imbutaktak ti maysa kadagiti suspek.
Mangisayangkat metlaeng iti imbestigasyon ti unibersidad a pagadadalan ni Matthew bayat a kinondenar met iti fraternity ti nasao nga insidente.
Sumango iti kaso a panaglabsing iti Anti-Hazing Law dagiti suspek.
