BAGUIO CITY – Makitintinnulong ti Public Order and Safety Division (POSD) iti City Environment and Parks Management Office (CEPMO) ken Tourist Police Unit para iti pannakamonitor dagiti iligal a masahista iti Burnham Park, Baguio City.
Iti interview ti Bombo Radyo kenni Darryl Kim Longid, dadaulo ti Public Order and Safety Division, maysa kadagiti parikut a sangsangwenda iti agdama ket harassment manipid kadagiti sumagmamano a masahista.
Kinunana nga adda dagiti reklamo manipod kadagiti park goers nu sadino kinunada a nakatugawda laeng ngem madamdama ket darupen dagitoy dagiti masahista.
Nu sadino agturong dagitoy iti likodan dagiti park goers, iggemanda dagitoy ken ipaayan ti kunkunada a “sample massage” ngem itultuloyda daytoy agingga a malpas ken agsingirda ti bayad.
Innayona pay a gapu ta adu dagiti reklamo maipapan kadagiti masahista, plano ti city government nga agaramid ti addang tapno maipasardeng dagitoyen.
Malaksid pay iti dayta, kinunana nga adda dagiti pwesto nga in-suggestda kadagiti masahista ngem saan dagitoy nga immannugot.//Bombo Jez Lapizar
