Arigna a ginabgabsuon a basura ti kinaadu dagiti illegal campaign posters a binaklas wennu inikkat ti Commission on Elections- Baguio ken dadduma pay nga ahensiya ti gobyerno iti tallo nga oras nga operasyonda kadagiti nagduduma a lugar iti lokalidad idi agsapa.
Iti pannakiuman ti Bombo Radyo kenni Atty. John Paul Martin, election officer iti Baguio City, kinunana a daytuy ket ONE TIME, LAST TIME, ken BIG TIME a panagbaklasda gaputa inton Mayo 10, 2025 ti aldaw a panagkakampanya dagiti kandidato.
Kinunana nga iti naglabas nga eleksiyon ket nasurok laeng iti innem gasut a poster ti binaklas ti COMELEC iti syudad, ngem ita a tawen ket nakatambak a kas iti basura gapu iti kinaaduna.
Inlawlawagna a nabaklas dagiti nasao a poster gapu ta saan a naikarga dagitoy kadagiti designated poster area a mailabsing iti pagalagadan.
Ti baklas operation dagitoy ket nagsentro kadagiti lugar nga asideg kadagiti voting centers, kasta met kadagiti barangay halls ken dadduma py a public areas a kasapulan a madalusan tapnu maipanamnama ti natalged ken kinapudno nga eleksiyon
Dagiti nabaklas nga posters ket maidalan iti inventory ken maurnung dagituy kas ebidensiya sakbay a maipasa iti complex central office para iti panakaipatungpal ti sumarunu nga aksiyon.
Innayonna a dagiti nabaklas a poster ket maibilang a basura gapo ta dagitoy ket aaan a naaramid iti recyclable materials ken delikado iti aglawlaw.//BLNC Shona Ammiyao
