Manarimaan ti imbestigasyon ti Bureau of Fire Protection-Itogon tapno maduktalan ti nagtaudan wenno rason ti napasamak nga uram idiay Sitio Jahpa, Barangay Virac, Itogon, Benguet itay laeng agsapa.
Iti pannakiuman ti Bombo Radyo kenni Fire Officer 3 Billy Jack Palaci manipod Bureau of Fire Protection-Itogon, kinunana a nakaawat dagitoy iti awag iti oras ti alas otso ti agsapa a mangipakpakaamo a mapaspasamak ti structural fire.
Dagus met a nagresponda dagitoy ken nakasangpetda iti lugar iti oras ti alas otso disi otso.
Sigun kenni Palaci, nangrugi ti uram iti umuna a kadsaaran a pagtaengan ni Sheila Sacpa Cadio, 25-anyos paturong iti maikadua a kadsaaran a pagnanaedan dagiti nagannak daytoy.
Gapu iti napartak a panagramaram ti uram, nadangran ni Cadio ken naiturong iti pag-agasan kasta met a nairaman a nauram ti maysa a Toyota Hilux 1997 ken ti balay a tagikua ni Jacqueline Tongalag.
Kabayatanna, naideklara ti fire out iti oras ti pasado alas nuebe ti agsapa babaen ti nagtinulong a pwersa dagiti nagduduma nga ahesiya ken volunteers a pakairamanan ti Aurora Hill Fire Station Baguio City, PMA, 911 On Call, Sunshine Fire Volunteers, ken dadduma pay a grupo ken concern citizens.
Maibasar iti patta-patta dagiti kameng ti nasao nga ahensya, dumanon iti agarup P4 million ti gatad a nadadael iti structural fire.
