Manarimaan ti imbestigasyon dagiti otoridad iti napasamak nga uram sadiay Upper Camp, Philex Mine, Padcal, Camp 3, Tuba, Benguet ita nga aldaw.
Iti panakiuman ti Bombo Radyo iti Tuba Fire Station, naitawag kadagitoy ti nasao nga insidente iti 1:40 iti malem ken dagus met a nagresponde dagitoy.
Kalpasan ti mano nga oras, naideklara nga fire under control daytoy iti oras ti 3:00 P.M. ken naideklara ti fire out iti oras ti 4:00 P.M.
Iti nasao nga uram, sumagmamano a pamilya ti naapektaran nga iti agdama ket maberberipikar pay laeng ti bilang dagitoy.
Kabayatanna, nagpalagip ti Tuba Fire Station iti publiko nga agbalin dagitoy a naridam tapno maliklikan dagiti anyaman a kaso ti fire-related incidents.
Saan met a daytoy ti umuna a kaso ti uram iti sadiay Tuba gapu ta maipalagip nga iti isasangbay ti baro a tawen ket nailista ti kaunaan a kaso ti uram iti rehiyon Cordillera sadiay Camp 6, Kennon Road, Tuba.
