Agtultuloy ti imbistigasyon dagiti pulis iti napasamak a motorcycle incident idiay Kennon Road, Camp 7 a nakatayan ti maysa nga indibidual ken nakadangran metlaeng ti maysa pay nga indibidual idi laeng kalman.
Sigun iti imbistigasyon, pimmusay ti maysa a motorcycle rider bayat a ti back rider daytoy ket nadangran kalpasan a naidungpar ti motorsiklo dagitoy kadagiti dua a lugan.
Nabigbig met nasao a pimmusay a ni Kervin Pal-a Nicholas, residente idiay Tay-ac Rosario, La Union bayat a ti nadangran a back rider daytoy ket ni Homer Cabbigat Teg-ad, agtawen iti dua pulo ken residente idiay Loakan Access Road, Baguio City.
Maibasar iti imbistigasyon, naawanan iti kontrol ti rider ti motorsiklo rason a nagturong dagitoy iti bangir a kalsada agingga a naidungparda iti container van.
Malaksid iti dayta, naidungpar manen daytoy iti sabali pay a container truck a nangitunda iti pannakaipurwak dagitoy manipud iti motorsikloda.
Dagus met nga intaray dagiti nagresponde dagitoy iti Baguio General Hospital and Medical Center (BGHMC) para iti pannakatamingda ngem naideklara a pimmusay ni Nickolas bayat ti close medical supervision kenkuana.
