BAGUIO CITY – Inyunay-unay ti dadaulo ti Philippine National Police (PNP) kadagiti kameng ti Police Regional Office Cordillera (PROCOR) ti nainget nga implementasyon ti Intensified Cleanliness Policy kabayatan ti panagsarungkarna sadiay Camp Major Bado Dangwa, La Trinidad, Benguet.
Sigun kenni PNP Chief Police General Guillermo Eleazar, nasken a maisayangkat ti kinadalus kadagiti istasyon ti pulisya ken iti komunidad.
Dinakamatna a ti PROCOR ti maika-siyam a Regional Office ti PNP a binisitana ken napnek daytoy iti nakitana a kinadalos dagiti nagduduma nga istasyon ti pulisya iti Baguio City ken Benguet a sinarungkaranna.
Isaksakad metlaeng ni PNP Chief Eleazar ti kinadalos iti recruitment system ti pulisya nga awanan ti padrino wenno palakasan system.
Kagiddan ti panagsarungkarna sadiay PROCOR, sinaksian a mismo ti PNP Chief ti panakauram dagiti puon ti marijuana a naparut kadagiti eradication operations ti nagduduma nga yunit ti PROCOR ken ti presentasyon dagiti armas a nakumpiskar wenno insuko dagiti komunista a grupo ken indibidual.
