Saan pay a naipaima iti maseknan nga opisina ti siudad ti pondo a maaramat para iti panakaipaay ti insentibo kadagiti atleta a nakipaset iti Batang Pinoy idi Disyembre, idi napan a tawen.
Iti panakiuman ti Bombo Radyo kenni Engr. Bonifacio Dela Peña, saan pay nga impaay ti Philippine Sports Commission ken ti Philippine National Games ti gatad a napangabakan dagiti atleta.
Sigun kenni Engr. Dela Peña, pakabuklan a Php7-million ti kasapulan para iti panakaipaay ti insentibo kadagiti atleta ngem iti agdama, dumanon laeng iti Php4 million ti gatad a nailatang rason a manarimaan paylaeng ti panagsarak ti local finance committee iti pagtaudan ti kanayonan a pondo.
Innayona pay a nagkurang ti pondo a nailatang para iti tawen dosmil bente tres rason a naguyod ti pondo iti agdama a tawen.
Inlawlawagna met a saanda a ninamnama ti bilang dagiti atleta a nangabak nu idilig iti pondo nga inlatang dagitoy.
Malaksid iti dayta, saan laeng a dagiti nangabak kadagiti pasalip ti masapol a maipaayan ti insentibo gapu ta sapasap a maipaayan dagiti nakipartisipar iti torneo.
Nupay kasta, impasigurado ni Engr. Dela Peña a maipaay iti kabiitan a panawen ti insentibo para kadagiti atleta apaman nga ipaima kadakuada ti Philippine Sports Commission ken ti Philippine National Games ti pakabuklan a gatad a kasapulan dagitoy.//Bombo Rob Dominguez
