BAGUIO CITY – Impeksa dagiti nagduduma nga stakeholders ken representatives ti vegetable industry ti pannakadismaya dagitoy kadagiti nagduduma nga ahensia ti gobierno gapu iti ilegal a panakaiserrek dagiti nateng ditoy pagilian.
Karaman kadagiti dimmar-ay iti panagdengngeg sadiay Senado da Benguet Farmers Cooperative General Manager Agot Balanoy a nakipaset iti virtual kasta met da Benguet Board Members Ruben Paoad (PAWAD) kenni Robert Namoro a personal a nagturong sadiay Senado.
Iti ekslusibo a panakiyuman ti Bombo Radyo Baguio, imbinglay ni Balanoy a dua a pakaseknan ti inyumanda iti panagrugi ti imbestigasion ti Senado.
Umuna ditoy ket ti kaawan iti Pest Risk Analysis kadagiti maang-angkat a nateng ditoy pagilian no sadino kinunana a maipasiguradoda a saan a dimmalan iti nasao a panagadal dagiti naipuslit a nateng , partikular dagiti saan Korean Strawberries.
Dinakamatna a dakkel a pangta daytoy saan laeng nga iti sektor ti ekonomiya ngem karaman payen ti salun-at dagiti consumers gaputta saan a naipasigurado ti kinatalged dagitoy manipud iti nagduduma a peste ken sakit dagiti nateng.
Kinunana a naduktalan iti Pest Risk Analysis dagitoy nga high risk wenno napeggad iti salun-at ti tao dagiti Korean Strawberries a maipuspuslit gapu kadagiti preservartives a maiyap-aplikar kadagitoy.
Iti baet dagitoy a panagadal, agduadua ni Balanoy no apay nga impaayan latta ti Department of Trade and Industy iti permit dagiti nasao a produkto idinto a nabatad a delikado dagiti produkto kadagiti salun-at ti consumers.
Maikadwa nga isyu nga inyuman dagiti stakeholders ti doble ken saan a kontrolado nga ingangato ti presio dagiti farm inputs kas iti abono, pestisidio ken dadduma pay.
Innayona a dakkel a karit daytoy kadagiti mannalon nangruna pay kadagiti panawen a nababa unay ti presio dagiti nateng.
Gapu iti daytoy, panggepda a mangbukel iti sabali manen a petision tapno maimbestigaran ti isyu ken tapno maaramid ti addang iti pakairegulate ti presio dagiti nagduduma a farm inputs.
