BAGUIO CITY – Agtalek ti maysa a geologist nga adda ti rason nu apay nga adda dagiti nadadael ken saan a nadadael nga istruktura idi dinmayyeg ti magnitude 7 a gingined iti Amianan a Luzon.
Iti interview ti Bombo Radyo Baguio, kinuna ni Jeffrey Perez, maysa a geologist iti PHIVOLCS, kaadoan kadagiti nadadael nga istruktura ket dagiti kaipatpatakder nu idilig kadagiti nabayagen a naipatakder.
Dinakamatna a kaadoan kadagiti nakita da a rason iti panakadadael dagiti istruktura ket ti saan a panakasurot ti building code, kurang ti engineering intervention ken substandard dagiti naaramat a materyales.
Sigun pay kenni Perez, posible a nakaapektar metlaeng ti workmanship iti panakadadael dagiti istruktura.
Imbinsa ti opisyal a nu agipatakder ti istruktura ket adda dagiti rumbeng a suroten tapno maipanamnama ti natibker a pundasyon ken kalidad a proyekto wenno trabaho.
Nakasurat iti National Building Code of the Philippines a nasken a saan a bumaba iti 6 inches ti kapuskol ti hollow blocks, 10 mm ti minimum a kapuskol ti steel bar ken tunggal tallo a metro ket adda ti maipatakder a poste.
Kabayatanna, impetteng ni Perez nga adda ti dua nga online application a mabalin a mai-download partikular ti HazardHunterPH ken howsafeismyhouse tapno maduktalan nu natalged ti pagtaengan wenno istruktura wenno kasapulanen a marenovate dagitoy.
