Inarestar dagiti otoridad idi Huebes, September 19, 2024 ni Yang Jian Xin ti kabsat iti ex-economic adviser ni sigud a President Rodrigo Duterte a ni Michael Yang.
Nakemmeg ni Jiang Xin idiay Ninoy Aquino International Airport Terminal 3 babaen iti Bureau of Immigration ken Presidential Anti-Organized Crime Commission, gapu kadagiti nagtutuon a kasona kas iti pakainaiganna iti illegal a Philippine Offshore Gaming Operators (POGOs), panaglabsingna mainaig iti immigration law ken dadduma pay.
Immun-una pay a kinuna ni Senador Risa Hontiveros a natakuatan ti Anti-Money Laundering Council (AMLC) a ni Hongjiang Yang ti sabali pay a kabsat iti ex-economic adviser ni Duterte ket addaan iti direkta a transaksion iti Baofu babaen ti joint account-na iti maysa nga incorporator ti Hongsheng a karaman iti Philippine Offshore Gaming Operators.
