Nainget ti panangipatungpal ti City Health Services Office iti inspeksiyon kadagiti amin a food establishment iti Baguio City iti intero a tawen tapno masigurado ti salun-at ken kinatalged dagiti maiserbi a taraon iti publiko.
Iti pannakiuman iti Bombo Radyo kenni Dr. Celia Flor Brillantes, dadaulo iti City Health Services Office, imbinglayna a mangisaysayangkatda iti surprise inspection kadagiti establisimiento ken kasta met a masapul a maiserra amin a pagserrekan dagiti peste para iti seguridad dagiti taraon.
Napasardeng met ti operasyon ti maysa a food establishment kalpasan a nadiskubre nga adda iti utot iti sabaw a naiserbi iti maysa a customer, gapuanan tapno dagus a nangipaay ti opisina iti automatic closure iti nasao a panganan.
Nasuspindir metlaeng dagiti 41 a food establishment iti siudad ti Baguio gaputa agtultuloy a nakitaan dagiti cigarette butts iti uneg iti negosioda a mangipakita iti panaglabsing kadagiti health ken sanitation standards.
Nagballaag met ni Dr. Brillantes a saan a maipapan laeng kadagiti dadakkel a panganan ti kinadalus nu diket uray kadagiti babassit a panganan.
Impettengna a masapul a nadalus ti kusina kasta metten ti comfort room.
Kabayatanna, pinalagipanna met iti publiko a nupay bimmaba ti kaso iti dengue iti siudad, masapul a makipagpartisipar ti tunggal maysa iti panagdalus iti aglawlaw kasta met nga agbalin a responsable iti tumunggal maysa.| via Bombo Khey Reparip