Agtultuloy latta ti kampanya ti Department of Health kontra iti dengue kasaruno daytoy iti panagngato ti kaso daytoy kadagiti sumagmamano a lugar iti pagilian a Pilipinas.
Sigun iti nasao a departamento nakailista dagitoy iti 60,000 a kaso ti dengue manipud Enero agingga Mayo iti agdama a tawen partikular idiay Quezon City ken iti Western Visayas.
Gapu iti daytoy, inyunay-unayda iti publiko a nasken nga agdalus kadagiti aglawlaw tapno awan ti aniaman a danum a mabalin a pagitlogan dagiti lamok.
Innayonda a liklikan nga agikabil kadagiti masetas iti nasipnget a lugar tapno saan a pagitlogan dagiti lamok partikular tatta a panagtutudo.
Kabayatanna, innayonda pay a dagus nga agpakonsulta iti doctor apaman a makapasar iti nangato a panaggurigor, nakaro a sakit ti ulo ken bagi, panagsarwa ken rashes.//Rose
