BAGUIO CITY – Agtultuloy ti panagwanawan ti Land Transportation Office (LTO) kadagiti colorum a lugan ditoy rehion Cordillera.
Iti interview ti Bombo Radyo Baguio kenni LTO-Cordillera regional director Francis Ray Almora, kinunana a kadagiti kalsada a mangisaysayangkatda ti inspeksion.
Nupay kasta, inaklonna a narigat a madetermina dagiti colorum a lugan gaputa nasken nga adda ti ebidensia a nagbayad iti plete ti pasahero iti nagluganan daytoy.
Innayonna a gapu iti kaawan ti public transport ket adda dagiti dadduma a manggungundaway a mangididiaya ti transportasyon.
Iti baet daytoy, impalagipna a no matiliw dagiti colorum a lugan ket dakdakkel ti mapukaw kadagitoy gapu iti nadagdagsen a pannusa.
Kabayatanna, imbinglay ni Dir. Almora nga agingga ita ket dagiti laeng UV Express nga addaan ruta paturong iti Benguet ti napatgan nga agbiahe babaen iti LTFRB bayat nga awan pay ti pammalubos iti dadduma nga inter-regional operation.
Sigun kenkuana, nasken nga adda nga umuna ti mabukel a sanitary protocols kadagiti pagtaudan nga LGU ken iti destinasyon nga LGU tapnu maliklikan ti panagwaras ti COVID-19.
