Kiniddaw ti kampo ni Cassandra Li Ong ti incorporator ti Whirlwind Corporation iti Korte Suprema a lapdanna ti dua a legislative panel, a maipagarup a nanglabsing iti karbenganna nga agulimek kabayatanna dagiti napalabas a hearing daytoy.
Maibasar iti 27-page petition para iti writ of certiorari ken prohbition, kiniddaw ti kampo ni Ong iti korte ti panakaipaulog iti temporary restraining order wenno preliminary injunction kontra kadagiti sumagmamano a komite iti Senado ken House of Representatives a mangim-imbestigar kadagiti maipagarup nga illegal nga aktibidad a nainaig kadagiti Philippine Offshore Gaming Operators (POGO).
Kiniddaw pay ti kampo ni Ong iti korte a pagbalinenda a permanente ti injunction kalpasan ti proceedings.
Kabayatanna, kinuna ni Senator Risa Hontiveros nga awan ti posisionna a mangipaay iti komento iti nasao a petision, agsipudta awan pay ti opisial a naawat daytoy mainaig iti nasao a petision.
Maipalagip nga adda ni Ong iti kustodia ti Kamara gapu iti contempt order, kalpasan a naaresto idiay Indonesia ken ti kaduana ni Shiela Guo idi napalabas a bulan.
