BAGUIO CITY – Kiniddaw ti lokal a gobyerno ti Baguio ti panakanayon ti ektarya ti lote iti Baguio Dairy Farm nga immunan nga indonar ti Department of Agriculture iti siudad.
Sigun kenni Mayor Benjamin Magalong, personal a nakasaritana ni Agriculture Secretary William Dar para iti posible a kanayonan a dua nga ektarya a maited iti siudad tapnu agbalin a 10 nga ektarya.
Kinunana nga inted met ni Secretary Dar ti commitment daytoy iti nasao a kiddaw.
Innayonna a babaen iti kanayonan a lote ket adda ti mangakomodar iti dadakkel a proyekto ti lokal a gobyerno a maimplementar iti nasao a lugar.
Binigbigna pay ti sigud a mayor ti siudad a ni Atty. Mauricio Domogan gapu iti addang para iti panakaipaay iti siudad ti 8.2 nga ektarya ti Baguio Dairy Farm.
Sigun kenni Mayor Magalong, agserbi ti dumanon tallo nga ektarya para iti singasing a waste-to-energy plant bayat a ti agarup uppat nga ektarya ket para iti singasing a south-bound terminal ken ti nabatbati a lote ket para iti dadduma nga expansion requirements ti lokal a gobyerno.
