BAGUIO CITY – Indepensa ni Baguio City Mayor Benjamin Magalong ti ordinansa a mangipangato iti household garbage collection fee manipod iti P20 paturong iti P75 tunggal bulan, nga inaprobaran iti City Council idi napalabas a lawas.
Sigun kenni Magalong, nasurok 20 a tawenen a saan a ngimmato iti singir iti basura uray dumanon iti P200 milion tunggal tawen ti nabusbos iti siudad tapno maipaayan iti subsidia ti koleksion ken panangitugot kadagiti non-recyclable a basura kadagiti landfill iti ruar iti Baguio.
Kinuna ni Mayor Magalong a kasapulan ti kanayunan a singir tapno mapagtalinaed ti dekalidad a serbisio ken maital-o ti komprehensibo a solid waste management program iti siudad.
Impettengna nga awan metlaeng iti maitunos a lugar iti Baguio para iti bukodna a landfill isut gapuna nga agtultuloy nga iruruar iti siudad dagiti basura daytoy.
Iti sidong iti ordinansa, mabalin a makagun-od iti 10% discount dagiti agbayad iti pakabuklan a tinnawen a garbage fee sakbay ti Abril 20.
Maipangato metlaeng ti garbage fees para kadagiti negosyo, hotel, dormitoryo, ospital ken dadduma pay nga establisimiento maibasar iti kinadakkel ken kapasidad.
Maaddaan metlaeng iti multa dagiti saan a nasayaat iti panangibellengda iti basura, bayat a ti garbage fees ket otomatiko a ngumato iti 10% tunggal tawen mangrugi inton 2027, maibasar iti periodic review iti City Council.
Maur-uray laengen ti pirma ni Magalong sakbay a maipatungpal ti ordinansa.
