Awanen ti kasapulan a bayadan dagiti indibidwal nga agpangpanggep nga agampon gapu ta nagbalinen nga administratibo ti proseso daytoy.
Iti panakiuman ti Bombo Radyo kenni Felisa Singlan, Officer-In-Charge ti Regional Alternative Child Care – Cordillera, saanen a kasapulan a dumalan iti korte ti panagampon iti agdama.
Inlawlawag ni Singlan nga iti Regional Alternative Child Care ti mabalin a pagaplikaran dagiti agampon sakbay a maiyendorso daytoy iti National Authority for Child Care (NACC).
Nupay awanen ti bayadan, kasapulan ladta dagiti agampon nga isagana dagiti sumagmamano a kasapulan a dokumento kas ti medical certificate, psychological assessment report, authenticated Birth Certificate, NBI clearance, certificate of employment, whole body picture, marriage certificate nu naasawaan.
Malaksid iti dayta, kasapulan metlaeng nga iyaramidan dagiti social workers ti home study report, ken child study report dagitoy.
Sigun kenni Singlan, dumaldalan iti nainget a panakasukimat ti aplikasyon dagiti agampon tapno masigurado a kabaelan dagitoy nga aywanan dagiti amponenda nga ubing, saan laeng nga iti pinansyal nga aspeto.
Inlawlawagna pay a saan nga agpatingga ti akem dagitoy iti panangtingiting iti aplikasyon dagiti agampon gapu ta mangipatpatungpal metlaeng dagitoy ti monitoring tapno makitada nu nasayaat ti kasasaad ti ubing iti sidong ti baro a pamilyada.
Kabayatanna, nakaawaten ti regional office ti inem a pulo (60) a petisyon iti nagduduma a klase ti panagampon nu sadino tallo pulo ket siam (39) kadagitoy ti naiyendorso iti central office ti National Authority for Child Care bayat a dua pulo ket dua kadagitoy ti naipaayan ti order of adoption.//Bombo Rob Dominguez
