Posible a mangipila ti National Bureau of Investigation (NBI) iti kaso kas iti arson mainaig iti panakauram iti maysa nga opisina iti Department of Public Works and Highways (DPWH) idiay Quezon City partikular ti DPWH Region 4B (Mimaropa) office.
Sigun kenni National Bureau of Investigation Director Jaime Santiago, manarimaanen ti panangadal iti forensic team kadagiti kagawaan a nairaman iti nasao nga uram.
Innayonna a kitkitaenda a naimbag ti nature dagiti rekord wenno files a naikarga iti nasao nga opisina gapu ta mapapati a naglaon metlaeng daytoy kadagiti dokumento iti Bureau of Research and Standards (BRS) iti DPWH ken dagiti materials testing facilities daytoy.
Immuna metten a naipakaammo a nangrugi ti uram iti maikatlo a kadsaaran iti pasdek nu sadino, sigun kadagiti kameng iti Bureau of Fire Protection (BFP) ket ti maawagan nga octopus connections kadagiti kable iti kuryente ti nagtaudan iti uram.
Nupay kasta, impanamnama ti opisyal a kitaenda dagiti amin nga angulo seknan iti daytoy.
Mainaig iti dayta, kinuna ni Santiago a mapaayaban amin a personnel nga agop-opisina iti third floor iti nasao a pasdek tapno mangipaay dagitoy iti pammalawag.
