BAGUIO CITY – Inyunay-unay ti Department of Agriculture (DA) – Cordillera nga in-inot a nakontrol dagiti kaso ti African Swine Fever (ASF) ditoy rehiyon Cordillera.
Sigun kenni DA-Cordillera Regional Director Cameron Odsey, bimmaban ti bilang dagiti baboy iti rehion a naapektaran iti ASF ken iti agdama ket maysa laengen a baboy ti nakaptan ti ASF.
Nupay kasta, kinunana nga agtultuloy latta ti panagwanawan ken panangbantayda tapnu maipanamnama nga ASF-free ti rehiyon ken tapnu masolusyonan ti nangato unay a presyo ti karne ti baboy.
Sigun kenkuana, agtaltalinaed nga awanan ti kaso ti impeksion ti ASF sadiay Abra ken Apayao gapu iti nainget nga animal quarantine checkpoint dagitoy.
Imbinglayna metlaeng a manipud kadagiti 77 a munisipyo iti entero a Cordillera ket 22 a munisipyo ti nakailistaan ti kaso ti ASF.
Iti agdama ket agtataod paylang sadiay Region 1 wenno Ilocos Region i suplay ti baboy a maiturturong ditoy rehiyon nangruna iti siyudad ti Baguio ken probinsya ti Benguet.
