BAGUIO CITY – Inaklon ti City Health Services Office (CHSO) ti 131% a ngimatoan ti kaso ti dengue iti Baguio City manipod Enero agingga Abril 16 ti agdama a tawen.
Iti inteview ti Bombo Radyo Baguio kenni CHSO Chief Dra. Rowena Galpo, kinunana a nakailista ti siudad iti 102 a kaso ti nasao a sakit manipod Enero agingga Abril 16 ngem awan met ti nailistada a pimmusay.
Nanangatngato daytoy iti 41 a kaso a nailista ti siudad iti nagduduma a barangay iti kapad a panawen idi 2021.
Nabigbig met ti barangay Bakakeng Central ken San Luis Village nga addaan iti clustering ti dengue wenno nagsasaruno ti nailistada a kaso iti uneg ti dua agingga 3 a lawas.
Karamanda pay kadagiti babbarangay a siguen a makailislista ti kaso ti dengue kadagiti naglabas a tawen.
Inyunay-unay met ni Dra. Galpo ti posible a rason ti agtultuloy a panakailistada iti dengue kas iti presensia dagiti breeding sites wenno mabalin a pagbalayan ken pag-itlogan ti lamok malaksid kadagiti asideg iti waig ken kanal.
Nupay kasta, kinunana nga awan pay iti alert level status wenno outbreak level ti kaso ti siudad malaksid nga iwan-wanawanda daytoy nangruna nu madanon ti bulan ti July agingga Setyembre a pakailislistaan ti dengue.
