Maob-obserbaran ita panagngato ti kaso ti hand, foot, ken mouth disease iti rehiyon Cordillera nangnangruna ita a panawen ti panagtotodo ken panagrugi ti serrek ti eskwela dagiti ubbing.
Sigun kenni Dr. Jennifer Joyce Pira, medical officer IV, iti Public Health Science Cluster ti DOH-CAR, kinunana a dumanon iti 703 ti nailista a kaso manipud bulan ti Enero agingga bulan ti Hunyo ita a tawen.
Manipud iti nasao a bilang, 399 wenno 57% dagiti lallaki ti naapektaran iti nasao a sakit.
Innayon pay ti nasao a doktor a ti kaso ita a tawen ket adayo a nangatngato manipud iti 258 a kaso idi napalabas a tawen.
Gapu iti dayta, nagpalagip ni Dr. Pira a tapno maliklikan ti panagsagaba iti nasao a sakit nangnangruna kadagiti ubbing ket maiyunay-unay ti umno a panagbogo, saan a kanayun a panang-eggem iti rupa, ken panangliklik iti maki-close contact kadagiti infected person babaen iti panag-arakop kadakuada.
