BAGUIO CITY – Nainget a bambantayan ti Department of Health -Cordillera ti siudad ti Baguio ken probinsiya ti Benguet kalpasan a nakailista dagitoy ti kaso ti ipupusay gapu iti dengue fever.
Sigun kenni DOH-Cordillera Entomologist III Alexander Baday, nailistada ti pito nga ipupusay gapu iti nasao a sakit a nailista iti siudad ken probinsiya ti Benguet.
Iti datos, nakailista ti siudad ti Baguio iti lima a kaso ti ipupusay ken dua ti nailista iti nasao a probinsiya.
Kinunana a nainget metlaeng ti monitoringda kadagiti dadduma pay a lugar iti rehiyon iti ngumatngato a kaso ti dengue iti lokalidad.
Maibasar iti datos ti ahensya manipod idi Enero agingga Hulyo 10 iti agdama a tawen, nakailistada iti 1, 171 a kaso ti dengue no sadino nangatngato no idilig iti kapada a paanwen idi napalabas a tawen.
Kabayatanna, impalagip manen ni Baday ti panangipatungpal dagiti umili ti 4S strategy tapno maliklikan ti panagngato ti kaso ti dengue.
Inrekomendarna metlaeng ti dagos a panagpakonsulta dagiti umili a makapaspasar ti panaggurigor, panaguyek ken dadduma pay iti kaasitgan a health facilities iti lugar dagitoy.
Kinunana a mabalin metlaeng nga agaramat dagitoy ti tele-consultation nangruna ita a mairekrekomendar ti panakalimitar ti iruruar ti publiko gapu iti pangta ti COVID19 ken ti napegpeggad a variants daytoy.
