Nagpinnirma ti Commission on Elections (Comelec) ken ti joint venture ti SMS Global Technologies Inc. kaduada ti Sequent Tech Inc. para iti umuna nga online voting and counting system (OVCS) para kadagiti Filipino overseas voters.
Ti joint venture ti kababaan a calculated bid para iti procurement ti online voting and counting system (OVCS) manipud kadagiti uppat a bidders para iti umadanin a 2025 midterm elections.
Sigun iti Commission on Elections (Comelec) pakabuklan ti P112 million ti bid dagitoy no sadino nababbaba daytoy no idilig iti nailatang a pundo a P465.8 million para iti online voting and counting system (OVCS) procurement.
Impetteng ni Commission on Elections Chairman George Erwin Garcia ti nasao nga online voting ket tapno maguyugoy dagiti ad-adu pay a Pilipino nga agbutos.
Innayon pay ni Garcia nga agingga ita ket adda paylaeng dagiti Pilipino idiay ballasiw-taaw a saan pay a nakarehistro para iti umadanin a panagbutos gapu ta adayo dagitoy kadagiti Philippine embassies.
Inlawlawagna metlaeng nga awan ti pakainaigan ti maysa nga overseas Filipino iti kasasaadna iti pagilian a pagtatrabahuanna kas Filipino tapno makabutos dagitoy.
Gapu iti dayta, mabalin a makabotos dagitoy uray awan ti umno a dokumento ken awan ti permanente nga address.
Kabayatanna, impanamnama ni Garcia iti publiko ti seguridad ken reliability ti nasao a voting system.//Rose
