Agtultuloy ti operasyon ti kaunaan ken kakaisuna a Kidney Care Center idiay Mt. Province a naka-base iti Munisipyo ti Sabangan.
Sigun kenni Patterson Jr. Sagantiyoc, Head Nurse iti nasao a pasilidad, addaan daytoy ti sangapulo ket dua a pasyente a nagtaud kadagiti nagduduma a munisipyo kas iti Besao, Bontoc, Natonin, Tadian ken nagtaud iti kabangibang a lugar kas iti Buguias ken Benguet.
Kinuna ni Sagantiyo nga adda pay dagiti libre a serbisyo-medikal maawat dagiti pasyente kas ti, dialysis, agas ken dadduma pay.
Aklonen ti nasao nga opisial nga adda dagiti karit a mapaspasaranda a pakairamanan iti workloads wenno ti kinaado ti trabaho.
Nupay kasta, kinunana a makaykayada wenno mababaelanda daytoy.
Kanayunanna, daytoy a kidney Care Center ket addaan ti maysa a Doctor to the Barrio, innem a nurses, duwa a laboratory technician, ken maysa nga admin staff a mangipapaay kadagiti nasao a serbisyo.
Sigun met kenni Vicente Layao, asawa ti maysa a pasyente nga addaan iti stage 5 Chronic Kidney Disease, kuntento daytoy kadagiti serbisyo ti nasao a center gapu ta malaksid a libre ket maasikaso a nga umno dagiti pasyente gapu ta tunggal pasyente ket maysa a nurse ti mang-asasikaso.
Kabayatanna, impeksa ni Mayor Marcial Jr. Lawilao a panggepda pay a pasayaaten ti serbisyo ken pasilidad-da tapnu ad-adda pay a nasayaat ti serbisyo-medical a maipaayda.
Maipalagip a ti nasao a kidney care center ket opisyal a nang-awat kadagiti pasyente idi March 22 iti napalabas a tawen.//Via Bombo Isabel P. Payangdo, Local News Correspondent
