BAGUIO CITY – Nailukat kadagiti light vehicles ti Kennon Road, Baguio City.
Iti public advisory a naipayulog, epektibo ti panaglukat ti kalsada idi kalman, Hulyo 31.
Daytoy ket babaen iti panag-aprobar ti Metropolitan Baguio, La Trinidad, Itogon, Sablan, Tuba, and Tublay (MBLISTT) babaen iti rekomendasyon ti Department of Public Works and Highways – Cordillera a mailukat laeng ti kalsada kadagiti light vehicles tapno mapalaka ti panagtravel nga agturong ken manipud iti Baguio, La Trinidad, Itogon, Sablan, Tuba, ken Tublay area.
Panggep pay daytoy a mapalag-an ti gunay ti trapiko iti daduma a kangrunaan a kalkalsada.
Maipalagip a naiparikep ti Kennon Road gapu iti dakkel a panagreggay ti daga gapu iti panagtudtudo nga intunda ti bagyo a Carina ken epekto ti agtultuloy a Habagat iti rehiyon.
