Napasaran ti panaglayos ti kalsada partikular sadiay Purok 13, Irisan bayat ti napigsa a panagbayakabak ti tudo itay laeng malem.
Iti pannakiuman ti Bombo Radyo kenni Arthur Carlos, Brgy. Captain ti Irisan, Baguio City, kinunana a kanayon a mapaspasaran ti panaglayos ti nasao a kalsada gapu iti kinabassit ti kanal a pagnaan ti danum.
Sigun kenkuana, dua a tawenen a pakaseknanda ti nasao a banag ngem saan paylaeng a naaksyonan iti baet a nagkiddaw dagitoy iti tulong iti Department of Public Works and Highways (DPWH) idi napalabas a tawen.
Malaksid iti dayta, kanayon metlaeng a bambantayan dagitoy dagiti ab-abot sadiay nangruna ita a panawen ti panagtutudo.
Iti baet dayta, kinunana a nakasagana dagitoy kasta metten dagiti evacuation centers a mabalin a pagbakwitan dagiti umili iti kanito nga adda ti didigra.
Kagiddan iti dayta, umap-apela daytoy kadagiti umili a saan dagitoy nga agibelleng iti basurada kadagiti kanal tapno saan a mapullatan dagitoy pagayusan ti danum.
Kiddawna metlaeng ti kooperasyon ken tulong dagitoy babaen iti panagmonitor ken panangireport iti kanito nga adda dagiti malayos a kalsada.
