Parikut ita dagiti market vendors ken farmers iti Hangar Vegetable Section ti Baguio City Public Market ti kinakurang ti parking space iti pannakaidiskarga dagiti natnateng manipod kadagiti nagduduma a lugar iti probinsiya ti Benguet.
Sigun kenni Sonny Benedicto, presidente ti Hangar Market Vendor’s Association, adda dagiti sumagmamano a farmers a saan a maka-deliver iti nateng iti hangar market gapo ta limitado ti espasyo sadiay ken awan ti umno a pagparadaan ken pagdiskargaan kadagiti natnateng.
Gapu iti dayta, kinunana a kaaduan kadagiti farmers ket pilien da nga ideliver dagiti apitda iti sabali a luglugar gapo ta nalawlawa ti espasyo a pagidiskargaan kadagiti nateng.
Impeksa pay ni Benedicto ti kinapateg ti espasyo a pagparadaan ken pagidiskargaan kadagiti natnateng a mailako sadiay Baguio Hangar market gapo ta dakkel ti epekto daytoy iti supply ken iti presyo dagiti natnateng.
Patien pay ni Benedicto nga iti kanito a maipaayan dagiti farmers iti espasyo a pagdiskargaanda kadagiti natnateng ket agbalin nga umdas ton ti supply dagiti nasao a produkto.
Kinunana pay a babaen iti daytoy ket dakdakkelto met ti mapastrekan wenno maganansia dagiti farmers ken dagiti vendors.
Innayonna a gapu iti limitado a disso a pangibagbagsakan dagiti farmers kadagiti natnatengda ket agkurang met ti oras iti panagidiskarga kadagitoy, rason a masapol a paspasanda nga aggaraw uray no agbaybayadda met iti toll fee.
Iti baet daytoy, nupay agtaltalinaed a kurang ti parking spaces dagiti farmers, imbinglay ni Benedicto a saan latta a maliklikan a mapasaranda ti oversupply iti natnateng no dadduma no aglaplapusanan met ti apit kadagiti mannalon.
Innayonna nga adda ladta dagiti mabulbulok ken masaysayang a natnateng.
Mainaig iti dayta, kinuna ni Benedicto a nasaysayaat nu adda ti remedyo wenno alternatibo a wagas a mabalin a maaramid tapno masuruan dagiti vendors wenno farmers kadagiti proseso a manglapped iti panakabulok dagiti natnateng.
Inlawlawagna a kasapulanda ti umdas a supply iti natnateng kadagiti panawen nga Adu dagiti turista a sumangsangbay iti siudad, malaksid laeng kadagiti weekdays.//BLNC Zairah Jane Valenciano
