Impaganetget ni Interior Secretary Benhur Abalos nga adda paylaeng ni Apollo Quiboloy iti Kingdom of Jesus Christ Compound idiay Davao City sigun iti intelligence report dagitoy.
Malaksid iti dayta, patien ti Philippine National Police nga agtaltalinaed ni Quiboloy iti nasao a compound.
Mainaig iti dayta, kinuna ni Abalos nga adda ti nasayaat a panagdur-as ita ti panagbirok dagiti maseknan nga otoridad kenni Quiboloy.
Nupay kasta, nagkedked ti nasao nga opisial a mangibutaktak kadagiti kanayunan a detalye.
Kabayatanna, kinuna ni Department of Justice (DOJ) Assistant Secretary ken spokesperson Mico Clavano nga awan ti impormasion a naawat dagitoy mainaig iti immigration process ken ti posible a panagtalaw ti nasao a dadaulo ti Kingdom of Jesus Christ iti pagilian, agsipudta addan iti outstanding hold departure order kontra kenkuana.
