BAGUIO CITY- Nadoble ti kita dagiti sumagmamano nga vendors a karaman kadagiti aglaklako iti Session Road Sunday Market Showcase iti Baguio City.
Daytoy ti inaklon ni Eda Ayan, miembro ti Market Vendors Association ken maysa nga wholesaler ken reseller ti nateng ken prutas.
Sigun kenkuana, nangatngato ti kita dagitoy iti panaglakoda sadiay Session Road nu idilig iti pwestoda sadiay Kayang, Hilltop.
Imbinsana dagiti rason iti panagngato ti kita dagitoy kas iti ad-adu nga oras ti panaglakoda ken nalaka pay nga turungen dagiti lokal a residente ken turista iti Session Road.
Kinunana pay a nakadepende met ti gatad ti abang dagitoy iti kinadakkel ti pwesto a sakopen ti pwestoda nu sadinno ti maysa nga tent ket aggatad iti P200 tunggal aldaw.
Maipalagip a panggep ti panakaiyuswat ti Sunday Market Showcase a mapadur-as ti lokal a produkto dagiti Micro, Small and Medium Enterprises (MSME) babaen ti Executive Order No.45, series of 2021 nga inyulog ti lokal a gobierno ti siudad tapnu mapalubosan ti temporaryo a panakairekkep ti Sessrion Road tunggal Domingo sipod Marso 28, 2021.
