BAGUIO CITY – Pimmusay ti maysa a lalaki a maatap nga agtatakaw kalpasan a maatap a natnag manipud iti maikanem a kadsaaran ti maysa a hotel sadiay Kisad Road, Baguio City idi parbangon.
Maibasar iti report ti pulisya, maysa kadagiti guest ti hotel ken mapapati a biktima ti nasao a lalaki ti nakaimatang iti insidente.
Iti salaysay ti nasao a guest, nariing dagitoy gapu iti napigsa nga uni manipud iti tawa ti silid dagitoy.
Mapapati nga iti nakalukat a tawa ti nagnaan ti nasao a lalaki a simrek iti silid ti guest ken sadiay nga inalana dagiti personal belongings dagitoy.
Nakita laengen ti guest ti panagruar ti lalaki iti nakalukat a tawa ken iti panakatnag daytoy.
Sigun met kadagiti personnel ti hotel a nakauman ti Bombo Radyo Baguio, makumikom dagitoy iti panagsagana para iti maysa a pasken ita nga aldaw isut gapuna a saanda a nadlaw a nakastrek sadiay ti nasao a lalaki.
Mapapati a sadiayen a nagturong ti lalaki kadagiti silid dagiti guests ken inalana dagiti kagawaan dagiti bisita a bukbuklen ti 11 a nagduduma nga android phone, pakairamanan ti maysa nga i-pod, maysa a Singapore dollar ken P1,510 a cash.
Nabigbig metten ti lalaki babaen iti ina-na a tinawagan dagiti otoridad iti mismo a cellphone daytoy.
Sigun pay kadagiti personnel ti hotel, maatap a ti nasao a lalaki ti nagtakaw iti kaarubada a pagtagilakuan.
Kinuna pay dagiti pulis a ti nasao a lalaki ti maatap a nagtakaw iti maysa pay a hotel ditoy siudad.
