Naireklamo iti istasyon ti pulisya ti maysa a lalaki kalpasan a dinangranna ti maysa a babai a kaarubana mismo.
Ti lalaki ket agtawen ti tallo pulo ket tallo, awanan trabaho, ken residente iti Upper Ambiong, La Trinidad, Benguet bayat a ti biktima ket agtawen ti duapulo ket dua, awanan asawa, estudiante, ken residente iti Cawat, Riverside, Ambiong, La Trinidad, Benguet.
Maibasar iti imbestigasyon ti pulisya, magmagna ti biktima idi nadlawna nga adda sumarsaruno kenkuana ngem saanna nga inkankano gaputa impagarupna a residente metlaeng iti nasao a barangay.
Idi nakasangpeten isuna iti ruar ti pagtaenganda, sarsarunuen latta daytoy ti suspek.
Gapu iti dayta, nagsuspetsa ti biktima ken dinamagna ti suspek nu ania ti kasapulanna ngem saanna a sinungbatan ti suspek nu diket inasitganna laeng daytoy.
Idi marikna ti biktima a sabali ti panggep ti suspek, dagos a nagtaray daytoy ngem ginuyod ti suspek ti biktima, inapputanna ti ngiwat daytoy, ken pinuwersana a ginuyod manipod iti pagtaengan ti biktima.
Inkagumaan a kinnagat ti biktima ti ima ti suspek a nangitunda iti suspek a mangibat iti biktima.
Nagpaarayat ti biktima babaen ti panagpukkawna a nagresulta met iti panagresponde dagiti kaarubana ken binigbigda ti suspek a residente iti nasao a lugar.
Nupay naiturong ti kaso iti barangay, saan a balligi ti mediation hearings a nangitunda iti barangay captain a mangipaulog iti certificate to file action.//Bombo Genzel Depayso
