BAGUIO CITY – Nakemmeg ti maysa a lalaki kalpasan a nagtakaw iti adu a kalablaba a badu manipod iti pagsalapayan ti maysa a pagtaengan sadiay Luboc, Balili, La Trinidad, Benguet idi kanikadua.
Nabigbig daytoy a ni Mark Uson Caloleng, 28-anyos, awanan trabaho ken residente ti Kilometer 3, Pico, La Trinidad, Benguet.
Nabigbig met ti complainant a ni Comelia Bactao Dela Cruz, 43-anyos, naasawan ken residente ti Luboc, Balili, La Trinidad, Benguet.
Maibasar iti report ti pulisya, naimatangan ti anak ti complainant ken ti kaarubada ti panangakas ti suspek kadagiti kailablaba a badbado nga insampay ti complainant.
Dagus a pimmanaw ti suspek ngem sinurot daytoy ti anak ti complainant.
Apag-isu met nga agpatpatrolya dagiti kameng ti La Trinidad PNP isut gapuna a nagpatulong kadagitoy ti anak ti complainant a nagresulta iti panakakemmeg ti suspek.
Narekober manipud iti suspek ti nagduduma a bado nga aggatad amin iti P6,800.
