Pangpanggepen ti City Health Services (CHSO) iti libre a bakuna para kadagiti maladaga iti siyudad ti Baguio mamingsan iti tunggal bulan iti aldaw ti sabado.
Iti pannakiuman ti Bombo Radyo kenni Sonia Insas, Nurse V iti City Health Services (CHSO), kinunana a nagkiddaw ti maysa a barangay captain iti siyudad a no mabalin ket adda ti maipatungpal a libre a bakuna tunggal weekends gapu ta adu dagiti working parents a saan a makaiapan kadagiti annakda kadagiti Brgy. Health Centers tunggal weekdays tapno ipabakuna dagitoy.
Gapu iti dayta, imbinglay ni Insas nga ad-adalenda pay a nalaing ti nasao a singasing.
Kinunana pay a ti naipatungpal a libre a bakuna para kadagiti 6 weeks to 1 year ken 29 days old iti opisina ti City Health Services (CHSO) iti siyudad ti Baguio ita nga aldaw ket paset ti World Immunization Day ken saan a binulan nga aktibidad ti City Health Services (CHSO).
Maipalagip a nagleppas ti pannakaipaay dagiti libre a bakuna itay alas dose ti pangaldaw nu sadino naidiaya dagiti nagduduma a bakuna a pakairamanan ti Pentavalent vaccine, Oral Polio Vaccine/Inactivated Polio Vaccine, Pneumococcal Conjugate Vaccine, ken Measles, Mumps, Rubella Vaccine.
