BAGUIO CITY – Nakemmeg ti maysa a miembro ti maysa a criminal group ken lider dagiti suspek a nangserrek ken nagtakaw iti balay ti maysa a nangato nga opisyal ti PNPA sadiay Tuba, Benguet idi napalabas nga Oktobre 4.
Nabigbig ti nasao nga indibidual a ni Archie Joshua Canlas Francia a nakemmeg sadiay Cacutud, Angeles City kalpasan nga inserbi dagiti nagtipon a pwersa ti pulisya iti Benguet ken Angeles City ti warrant of arrest daytoy nga impaulog ni Presiding Judge Jorge Manaois Jr. ti Regional Trial Court Branch 10, La Trinidad, Benguet.
Sumangsango ni Francia iti kaso a robbery with violence against or intimidation of persons nga addaan nairekomendar a piyansa a P100-K.
Naamuan a ni Francia ket kameng ti notorious a Pineda Criminal Group a responsable iti serye ti robbery incident, carnapping, illegal drugs trafficking ken dadduma pay nga iligal nga aktibidad sadiay Angeles City ken kadagiti kabangibang daytoy nga ili.
Immunan a nagsaruno a nakemmeg idi Oktobre 9 ken 10 dagiti tallo a kakadwa ni Francia a nabigbig a da Lady Bundalian Ronquillo, Brian Gomez Baesa ken Roland Mendoza Guevarra kalpasan a nagtitinudo dagitoy iti lokasyon sadiay Angeles City.
Suspek dagiti uppat iti panag-hold up ken panagtakaw iti balay ni PNPA Commandant of Cadets PBGen. Wilfredo Cayat a nangitarayanda iti personal belongings ken kwarta a nasurok P100-K sakbay dagitoy a naglibas babaen iti maysa nga SUV.
