BAGUIO CITY – Nakemmegen ti maan-anop a lider ti dakkel a drug group nga addaan operasyon ditoy Baguio City a nakipinnaltog kadagiti pulis a mangisaysayangkat ti checkpoint idi Abril.
Nabigbig daytoy a ni Christian Alvar Del Prado alyas Sadeek, 37-anyos, tubo ti Sta. Barbara, Pangasinan ken residente ti Baguio City.
Sigun kadagiti otoridad, ni Sadeek ti lider ti Sadeek Drug Group ken high value target ti Directorate for Intelligence ti PNP Headquarters, Camp Crame, Quezon City nga addaan ti warrants of arrest gapu iti kaso a pammapatay ken iti iligal a droga.
Nakemmeg ni Sadeek sadiay Sta. Barbara, Agoo, La Union kalpasan nga inserbi ti nagtipon a pwersa ti Baguio City Police Office, Tubao Municipal Police Station, PDEA-Region 1 ken CIDG-Baguio ti warrants of arrest daytoy nga addaan ti piyansa a P260,000.
Maipalagip nga idi Abril 18 ket nangisayangkat iti checkpoint dagiti kameng ti Baguio City Police Office – Station 2 ngem liniklikan dagitoy ni Sadeek a nakalugan iti SUV.
Kinamat dagiti pulis ni Sadeek ngem pinalpaltoganna dagitoy a nagresulta tapnu agbales met dagiti pulis.
Nupay kasta, nakalibas latta ti nasao a drug personality agingga a nasarakan laengen ti luganna sadiay San Luis, Baguio City ken ditoy a nakumpiskar iti naabandona nga SUV ti tallo a pakete ti mapapati a shabu. (-with Bombo Brigitte Marcasi)
