Imbutaktak ni Vice President Sara Duterte idi kalman a ti pamilia ni Presidente Ferdinand “Bongbong” Marcos Jr. iti adda iti likudan ti pammapatay ti sigud nga oposision ti pamilia Marcos ken sigud a senador a ni daydi Benigno “Ninoy” Aquino Jr.
Daytoy ket sungbatna idi nadamag nu anya ti komentona iti kinuna ni President Marcos a lapdanna dagiti “criminal attempts” iti biagna.
Iti agdama, awan pay ti komento ti Malakanyang babaen ti Presidential Communications Office (PCO) ken ti kabsat ti presidente a ni Senador Imee Marcos seknan iti nasao a banag.
Maipalagip a napapatay ni Aquino idi Aug. 21, 1983 idiay Manila International Airport.
Ti pannakatayna ket nangitunda ti panagprotesta kontra iti tatang ni President Marcos a ni Ferdinand Marcos Sr. a nangideklara iti Pilipinas iti Martial Law manipod 1972 agingga 1981 ngem nagturay aginggana idi napapanaw babaen ti people power revolution idi Pebrero 1986.
Maibasar iti Vera Files report, intuding ti patriarch ni Marcos ti Agrava Commission a mangimbestigar iti pannakapapatay ni Aquino.
Pinabasol ti Agrava Commission ti kasinsin ni Marcos a ni daydi Armed Forces Chief of Staff Fabian Ver.
Idi Disiembre 1985, inabsueltona ti Sandiganbayan ni Ver ken dagiti 25 pay a kaduana nga akusado.
Idi nagtugaw kas presidente ti asawa ni Benigno a ni Corazon Aquino idi 1986, nailukat manen ti kaso ken sangapulo ket innem a suldado ti nasentensiaan ti pannakaibalud ti agingga tungpal biag gapu iti “murder.”
Tallo kadagiti nakonbiktar a suldado ket pimmusay iti pagbaludan, bayat a dagiti dadduma ket naikkan ti “pardon” babaen kenni sigud a president Gloria Macapagal-Arroyo.
Impaganetget dagiti suldado a ti adda ti likudan ti pammapatay kenni Aquino ket ni Rolando Galman.
