BAGUIO CITY – Maiyakar ti lokasyon ti nalatak a Baguio Blooms Exposition kabayatan ti Panagbenga 2020 a sigud a maisaysayangkat iti Lake Drive ti Burnham Park.
Sigun kenni Baguio Flower Festival Foundation Inc. (BFFFI) chair Anthony De Leon, maisayangkat ti sumaruno a Baguio Blooms Exposition iti parking area ti Baguio Convention Center.
Inlawlawagna a nabayagen a panggepda a maisayangkat ti Baguio Blooms Exposition iti Baguio Convention Center gapu iti kalawa ti lugar.
Innayonna a makatulong ti addang iti panakakissay ti nailet a trapiko iti sentro ti siudad nga ituntunda ti panakairikep ti Lake Driver.
Maragsakan pay ti BFFFI gaputa naipaayan metten iti gundaway ti panakaisayangkat ti nasao a trade fair sadiay Convention Center kalpasan a saanda a napatgan idi napalabas a tawen.
Dinakamat ni De Leon a nainget a bambantayan ti lokal a gobyerno ti baguio ti panakaileppas ti patrabaho iti Convention Center para iti nasao a panggep.
Kabayatana, dagiti 16 nga entries iti landscaping competition a tampok iti sigud a Baguio Blooms Exposition and Exhibition ket maiwaras iti nagduduma a paset ti Central Business District.
