Nakastreken iti Philippine Area of Responsibility ti Low Pressure Area a manamnama nga agturong iti direksyon iti northwestward a mangapektar kadagiti lugar iti Extreme Northern Luzon.
Iti pannakiuman ti Bombo Radyo kenni Engr. Larry Esperanza, Chief ti PAGASA Baguio, kinunana a nababa ti posibilidad nga agbalin a tropical cyclone ti LPA, kasta met ti posibilidad nga ag-landfall daytoy. Nupay kasta, masapul latta ti panangbantay kadagiti posible nga epekto iti sasaaden iti panawen.
Inlawlawag met ni Esperanza nga uray bassit ti bilang dagiti tropical cyclones a sumrek iti PAR, manamnama a napipigsa dagitoy, ken mabalin nga agtinnag iti kategoria a typhoon wenno super typhoon.
Iti forecast ti PAGASA, agarup tallo agingga uppat a tropical cyclones ti mabalin a sumrek iti PAR ita a bulan.
Inlawlawagna met a ti napaspasaran a panagtudo iti siudad iti napalpalabas nga aldaw ket gapu iti localized thunderstorms ken epekto ti Southwest Monsoon wenno habagat.
Kabayatanna, nagpalagip ni Esperanza iti publiko nga uray awan ti bagyo, mabalin latta a mapasaran ti panagtudo gapu kadagiti localized thunderstorms ken habagat isu nasaysayaat a mangawit iti payong wenno jacket no rumwar ken kanayonen ti panagannad iti tunggal oras. | via Bombo Khey Reparip
