BAGUIO CITY – Natiliw ti maysa a babai nga online scammer a mangbikbiktima kadagiti flower vendors ditoy Baguio City babaen iti entrapmemt operation nga insayangkat dagiti otoridad sadiay Middle Quezon Hill, Baguio City idi agsapa.
Nabigbig daytoy a ni Gemmalyn Flores, 26-anyos, residente ti Upper Quezon Hill, Baguio City.
Naduktalan nga ar-aramaten ti suspek ti FB account nga “An Gela” nga ag-order ti money boquets manipud kadagiti biktimana.
Sigun iti maysa kadagiti biktima, nag-order iti money boquet kenkuana ti suspek a nagpammarang nga adda sadiay ballasiw taaw ken agbayad babaen iti remittance center.
Nupay kasta, naduktalan a peke ti resibo ti bayad nga impatulod ti suspek ken saan a pudno ti transaction numbers a nailanad iti resibo.
Innayonna a nagpa-errand pay ti suspek kenkuana a naka-aramatan ti nasurok P40,000.
Sigun met kenni PMaj. Annie Carmel Comising, dadaulo ti Digital Forensic Section/Intel and Invest Section ti PNP Regional Anti-Cybercrime Unit Cordillera, imbestigaranda ti anggulo nga adda ti kakadwa ni Flores.
Kinunana nga iti salaysay dagiti adu a biktima ken dagiti riders nga inaramat ti suspek ti serbisyoda ket posible nga adda ti kakadwa ti natiliw a suspek.
Iti agdama, sumango ti suspek iti kaso nga estafa.
