Imbutaktak ni Senador Raffy Tulfo a ti “backdoor exit” ket mapapati nga us-usaren dagiti “illegal recruiters” ken “human traffickers” tapno maibiahe dagiti Pilipino paruar iti Pilipinas a nangikari kadakuada iti trabaho iti ballasiw-taaw.
Iti “privilege speech,” kinuna ni Tulfo a mabalin a daytoy met laeng ti ruta nga inusar da dismissed Bamban, Tarlac Mayor Alice Guo ken dagiti kakaduana tapno makalibasda iti Pilipinas.
Sigun iti senador, dagiti overseas Filipino workers (OFW) ket naallukoy dagiti illegal recruiter nga agtrabaho idiay Europa a kasukat ti P400,000 a placement fee.
Nupay kasta, naidumduma ti wagas ti panagruarda iti Pilipinas.
Iti linaon ti bitla ti senador, kinunana a nangrugi a nagbiahe dagitoy idi Agosto 6, ken timmayab dagitoy babaen ti commercial flight manipod Manila paturong idiay Zamboanga.
Idi met Agosto 7, nagbiahe dagitoy manipod Zamboanga paturong idiay Tawi-Tawi.
Idi Agosto 8 iti kinabigatan, nagtuloy a nagbiahe dagitoy babaen ti bangka, ken mapapati nga inaprusan dagiti “bangkero” ti pribado a paset ti bagi ti maysa a babae nga OFW.
Gapu iti butengda a maitapwak iti baybay, saandan a nagkedked bayat ti pannaka-haras daytoy.
Dagiti bunggoy ti OFW ket nabaelan a nakadanon idiay Semporna, Sabah iti rabii ti Agosto 8, ken naiyakarda manen idiay Lumpur, Malaysia ken nagturongda idiay Thailanda.
Ti insidente ket dagos met a naireport iti opisina ni Tulfo ken iti Department of Migrant Workers (DMW) isut gapuna a naispal dagitoy.
Iti agdama, naituding a mang-imbestigar ti Senate Committee on Labor and Committee on Justice and Human Rights seknan iti nasao a banag.
