Minarkaan idi kalman iti Israel ti maikadua nga anibersaryo iti giera iti nagbaetanda iti militante a grupo iti Hamas.
Rimsua ti giera idi October 7, 2023 kalpasan nga inatake dagiti Hamas-led fighters ti Israel a nakaitunda iti ipupusay dagiti 1,200 nga indibidwal ken panakakawtibo dagiti agarop 250 a sabali pay.
Gapu iti dayta, nangipatungpal met ti Israel iti retaliatory attack a nangitunda iti ipupusay dagiti saan a bumaba iti 67,160 nga indibidwal maibasar iti datos iti health ministry.
Minilmilyon metten iti populasyon idiay Gaza ti napukawan iti pagtaengan ken mangnamnama laeng kadagiti maipaay nga humanitarian aid.
Gapu iti nasao a giera, makapaspasar dagiti tattao idiay iti famine ken panagbisin kasta metten iti malnutrisyon nangruna kadagiti ubbing.
Nupay kasta, mangnamnama dagiti daduma a maisardengen daytoy babaen iti katulagan nga isaksakad ni United States president Donald Trump ken daduma pay a mangibabaet wenno mediators.
