BAGUIO CITY – Naka-alerto met itan ti probinsia ti Apayao para iti panagannad kontra iti coronavirus disease.
Ipatpatungpal ita ti lokal a gobierno ti pannakipasidong dagiti umili sadiay iti mandatory 14-day home-quarantine period.
Maibasar iti statement, sakup ti pammilin ti amin a residente ti probinsia, pakairaman dagiti sangaili dagitoy a nagturong kadagiti lugar a nagpositibo iti COVID 19.
Masapul a maipasidong iti quarantine dagiti nagturong sadiay National Capital Region, Rizal, Bulacan, Negros Oriental, Camarines Sur, Lanao del Sur, Pampanga, ken Batangas.
Kabayatanna, temporaryo met a nairikep dagiti amin a tourist spot sadiay Apayao babaen iti bileg ti Memo No. 82 nga impaulog ni Governor Eleanor Bulut-Begtang.
Immunan nga inbilin ni Begtang ti kanselasion kadagiti crowd-drawing events iti intero a probinsia a nangrugi pay idi Marso 10.
Saan metten nga agawat ti Far North Luzon General Hospital and Training Center a masarakan sadiay Quirino, Luna, Apayao kadagiti pribado a pasyente.
Maitunos daytoy iti pammilin a dagiti amin a pribado a silid kadagiti amin a parapubliko nga ospital iti NCR ken Luzon ket mapagbalin nga isolation rooms para kadagiti kaso ti COVID-19 ken dagiti patients under investigation (PUIs).
