Impakaammo ni House Speaker Bojie Dy III a maipaayan iti sag-₱7000 dagiti mannalon babaen iti P6.7 trillion proposed budget para inton umay a tawen.
Daytoy ket kas tulong kadagiti mannalon kadagiti napukaw a pamastrekanda gapu iti nababa a farmgate prices iti pagay.
Sigun kenni Dy, ti nasao a tignay ket mai-complement metlaeng iti naipaiyulog a pammilin a temporaryo a mangsuspindir iti panagangkat iti bagas tapno masalakniban dagiti lokal a prodyuser iti nasao a produkto manipod iti posible nga oversupply ken nababa a presyo.
Malaksid iti dayta, kinuna ti house speaker a kiniddawda kenni President Ferdinand Marcos Jr. nga amin a subsidy manipod iti Department of Agriculture (DA) kas iti seed subsidy ket maipaay laengin a cash kadagiti mannalon.
Imbinglay ni Dy nga adu kadagiti mannalon iti probinsya iti Isabela ti mangilaklako iti pagay iti walo a piso tunggal kilo— adayo a nababbaba ngem iti ₱16 agingga ₱18 a kasapulan tapno mabawi dagitoy ti nabusbosda iti produksyon.
