Naipaayan ti pammaddayaw ni Juan Carlos Sumbad, maysa a 16 anyos nga Special education student gapu iti kinabanuarna kalpasan a tinulunganna ti maysa a 64-anyos a lalaki a nasarakanna nga awanan ti puot iti igid ti kalsada
Maibasar iti pannakiuman ti Bombo Radyo kenkuana, napasamak daytoy idi paawid isuna iti pagtaenganda.
Kinunana a nakalugan daytoy ti jeep idi nakitana ti nataengan a nakailad iti igid ti kalsada.
Malidayan daytoy gapu ta adu ti tattao a lumablabas iti lugar ngem awan ti timmulong iti lalaki malaksid kenkuana.
Saanna met ninamnama a naatake iti puso ti lalaki a tinulunganna.
Inakklonna a nagdudua pay daytoy sakbayna a tinulungan ti lalaki gapu ta mabuteng daytoy a saan nga usto ti aramidenna ngem nupay kasta inaramidna ti amin na tapno maispal ti lalaki.
Dakkel met ti panagyamanna iti Sangguniang Kabataan Federation gapu iti impaayda a basic life support ken first aid training gapu ta daytoy ti rason nu apay nga ammona ti inaramidna idi tinulunganna ti nataengan a lalaki.
Iti panakakita ni Sumbad iti lalaki nga awanan iti poot, nangipaay daytoy iti tallo a round ti 100 a chest compressions sakbay a simmangpet dagiti Emergency Medical Services
Naammuanna met manipod iti anak ti tinulunganna a 64-anyos a daytoy ket agdama nga adda iti Philippine Heart Center ita para iti scheduled bypass operation daytoy.
Kinuna pay ti anak ti nataengan a posible a nagbalin pay a kritikal ti sitwasyon ti amana nu haan daytoy a tinulungan ni Sumbad.
