BAGUIO CITY – An-anupen ita dagiti pulis ti maysa a mannalon kalpasan a pinalpaltoganna ti maysa a baro sadiay Pilac, Bunot, Paracelis, Mountain Province idi Sabado.
Nabigbig daytoy a ni Bernard Malindao Delos Santos, mannalon, ken residente iti nasao metlaeng a lugar.
Ti met biktima ket nabigbig a ni Jaypee Palangdao Ambillay, 26-anyos, baro, mannalon ken residente metlaeng sadiay Pilac, Bunot, Paracelis, Mt. province.
Sigun iti report, ginandat ni Ambillay nga anawaen ni Delos Santos gapu iti nabara a panakirikyarna iti maysa a lalaki.
Nangitunda met daytoy iti nabara nga argumento iti nagbaetan ti suspek ken ti biktima.
Ditoy met nga innala ti suspek ti riple iti balayna ket pinalpaltoganna iti namin-adu a daras ti biktima.
Nagsagrap ti biktima iti adu a tama ti bala ti paltog iti bagina a nangitunda iti dagus nga ipupusayna.
Dagus met a naglibas ti suspek kalpasan ti insidente.
