Guyguyuguyen ti maysa a grupo ni President Ferdinand Marcos Jr. a saanna nga i-veto ti gakat nairanta a manglapped iti panagsikog dagiti ubbing, ken idagdagdagda a basaenna kitdi a naimbag ti gakat.
Kasaruno ti panangbabalawna ni President Marcos, Jr. a “wake absurdities” ti gakat ken kinunana a mangikagkagumaan a mangisuro kano kadagiti ubbing nga agmasturbate ken mangikkat iti turay dagiti nagannak kadagiti annakda.
Sigun iti grupo a Child Rights Network (CRN) Philippines – a maysa kadagiti kadakkelan nga alliansa para iti karbengan dagiti ubbing– nasaysayaat nu ilawlawag ni President Marcos Jr. nu ania dagiti paset ti gakat a mapagduaduaan para kenkuana.
Para kadagiti nasao a grupo, ti napateg kenkuada ket basaen ti presidente ti probision ti gakat a nasayaat, gaputa nagdalan daytoy iti konsultasion kadagiti child rights organizations.
Maipalagip nga itay laeng nabiit, nagbalin a sentro ti diskusion ti Comprehensive Sexuality Education kalpasan nga inyebkas dagiti mammanday-linteg ti pakaseknanda maipapan iti linaon ti gakat.
Ngem sigun kenni Senador Risa Hontiveros, maysa kadagiti chairman a nangisagana iti Senate Bill No. 1979, kinunana a ti childhood masturbation ket saan a paset iti maisingsingasing a gakat.
