Natnag ti maysa a closed van idiay Balacbac Circumferential Road Santo Tomas Proper, Baguio City iti pasado alas singko itay parbangon.
Maibasar iti inisyal a report ti pulisya, dagiti dua nga indibidual a nadangran ket agpada a lalaki a residente sadiay Pampanga.
Ti pahenante, ket addaan iti ligal nga edad ken manipod Sta. Ana, Arayat, Pampanga bayat a ti drayber ket saan paylaeng a nabigbig a tubo sadiay San Fernando, Pampanga.
Maibasar iti salaysay dagiti sumagmamano a residente sadiay a nakauman ti Bombo News Team, pasalog ti lugan ken naklaat dagitoy iti uni ti natnag a lugan iti nasao a paset ti kalsada
Kinunada pay a paspas ti panagpataray ti nasao a closed van rason a nupay adda ti barikada wenno cavite ti nasao a kalsada ket nadadael pay daytoy isu’t gapuna a natnag daytoy iti rangkis a nasurok 150 meters ti kaunegna a nagresulta iti pannakadadael ti lugan ken pannakaiwarang ti imet daytoy a wagwag wenno badbado.
Malaksid iti dayta, inyebkasda a saan laeng a daytoy ti aksidente a napasamak iti nasao a paset ti kalsada agsipudta adda metlaeng dagiti napalabas nga insidente nga adda dagiti natnag a lugan sadiay.
Manarimaan metten ti pannakataming dagiti biktima.
Mainaig iti dayta, iti panakiuman ti Bombo Radyo kenni PMAJ Marcy Grace Marron, ti PIO ti BCPO, kinunana a posible a mechanical defect wenno naaddaan iti loose break ti lugan nga isu ti rason ti aksidente.
Gapu iti dayta, agpalpalagip manen daytoy kadagiti amin a motorista a kasapulan dagitoy a kitaen a nalaing nu nasayaat ti kondisyon ti lugan ken ti bagi dagitoy.
Kinunana pay a rumbeng nga ammoen dagiti motorista ti terrain ti kalsada a daldalyasaten dagitoy tapno mailiklikda iti aksidente.
