LA TRINIDAD, BENGUET – Umap-apela ti maysa a jeepney driver kadagiti amin a pasahero nga agbayad dagitoy nu agcommuteda kadagiti pampasahero a jeep.
Sigun iti senior citizen a saannan a kayat a mainagannan, adda dagiti gundaway a saan nga agbayad iti plete dagiti sumagmamano a pasahero.
Dinakamatna a maysa kadagiti kapadasanna ket maysa laeng a tao ti binayadan ti pasahero ngem adda gayam kadwana wenno dua dagitoy a bimmaba iti jeep.
Innayonna nga adda metlaeng dagiti dadduma nga agited iti kurang a plete bayat a dagiti dadduma ket agkiddaw iti diskwento uray saan met dagitoy a kwalipikado.
Impeksana pay a nu dadduma ket saanna a madlaw wenno mailasin dagiti saan a nagbayad nangruna nu ado ti pasahero.
Inyunay-unayna a maawatanna ti kasasaad dagiti pasahero ngem inlawlawagna a kasapulan nga agbayad dagitoy tapno adda met ti pambayadda iti gasolina ken matgedanda.
Maipalagip a ti inaprubaran ti Land Transportation Franchising and Regulatory Board ket P13.00 ti minimum a plete kadagiti traditional jeep bayat a P15 met kadagiti moderno a jeep nu sadino daytoy ket para iti umuna nga uppat a kilometro.
Aprudo metlaeng ti nasao nga ahensiya ti 20% a diskwento para kadagiti senior citizen, estudyante ken Persons With Disabilities (PWDs).
Manarimaan met nga ad-adalen ti LTFRB ti kiddaw dagiti transport group a kanayonan a P2 tapno agbalin a P15 ti minimum a plete kadagiti traditional jeep ken P17 kadagiti modern jeep.
