Impaganetget ti House of Representatives a sinurotda ti Konstitusion ken umno a proseso iti panag-impeach kenni Vice President Sara Duterte, sigun iti maysa a mammanday-linteg nga agtugaw kas maysa kadagiti prosecutors iti impeachment trial.
Impasigurado ni San Juan City Representative Ysabel Zamora ti nasao a banag kas sungbat iti petision nga impila ni Vice President a mangkidkiddaw iti Korte Suprema nga ideklara a null and void ti impeachment complaint.
Kinuna ni Zamora nga awan ti panangabuso iti desision ti House of Representatives a saan a maiturong ti tallo nga impeachment complaints iti Office of the Speaker iti nasurok a makabulan gapu ta agbirbirok dagiti miembro iti reklamo no ania nga impeachment complaint ti suportaranda.
Kinunana pay a ti impeachment complaint a pinirmaan ti dua gasut ken sangapulo ket lima a kameng ti House of Representatives ket saan a naglabsing iti “one year ban.”
Nakalanad iti Konstitusion nga apaman a ti impeachment complaint ket inyendorso ti nasurok one-third dagiti kameng ti House of Representatives, ti impeachment complaint ket direkta a maiturong ti Senado para iti “trial.”
Para kenni Congressman Zamora, numan pay ligal ti kampo nga inaramid ni Vice President Duterte a mangkiddaw iti Temporary Restraining Order iti Korte Suprema, ti tignay ket mabalin a mangipasimudaag a dalan tapno maitantan ti proceedings.
